Donostiako Udaleko Euskara Zerbitzuak urtean bitan antolatzen ditu merkataritza eta ostalaritzako profesionalei zuzendutako euskara-ikastaro espezifikoak: lehena, otsailetik ekainera; eta bigarrena, urritik abendura.
Ikastaroa 60 ordukoa izango dira eta ikasle bakoitzak 60 € ordaindu beharko ditu. Interesdunek online eman ahal izango dute izena, edota aurrez aurre Euskara Zerbitzuaren bulegoan ( Konstituzio plaza 2).
Ikastaroa hiriko euskaltegietan emango da (AEK, Ilazki, Hitzez, Legazpi 6, Urrats eta Urumea).
2023an, guztira, 221 merkatari/ostalarik egin zuten Udalak antolatutako ikastaroa. Horietatik 88 lagun aritu ziren otsaila-ekaina bitarteko ikastaroan eta 133 lagun, berriz, urritik abendura bitartekoan. Eta, 221 lagun horiekin, guztira, 25 talde osatu ziren: 10 otsailean eta 15 urrian.
Hasiera maila eta jarraipenekoa
Merkataritzako eta ostalaritzako elkarte eta erakundeekin (Gipuzkoako Ostalaritza Elkartea, San Sebastian Shops eta Gipuzkoako Merkatarien Federazioa) lankidetzan antolatzen ditu Udalak sektore horietako profesionalei zuzendutako euskara-ikastaroak.
Ikastaro horien azken helburua da jendaurreko zerbitzua euskaraz emateko ulermena nahiz gaitasuna lortzea eta, horrenbestez, bezero euskaldunei arreta hobea eskaintzea. Horretarako, batetik, hasiera mailako ikastaroak eskainiko dira eta horietan zerbitzua euskaraz ematen hasteko oinarrizko komunikazio-gaitasuna landuko da. Eta, bestetik, jarraipen mailako ikastaroak ere izango dira aukeran, bezeroekiko harremanetan nahiz, oro har, laneko harremanetan euskara erabili ahal izateko.
0 iruzkinak